طالبان خواستار برقراری روابط با تاجیکستان شد

شفقنا افغنستان- شیرمحمد عباس استانکزی؛ معاون سیاسی وزیر خارجه طالبان از تاجیکستان خواسته‌است که با دولت این گروه روابط خود را برقرار کند.

به گزارش شفقنا افغانستان و به نقل از تلویزیون ملی افغانستان، استانکزی این اظهارات را در مرکز فرماندهی ارتش افغانستان در شهر هرات بیان کرد.

استانکزی در اظهارات خود گفته‌است که «افغانستان خانه‌ مشترک همه افغان‌ها است و تمامی افغان‌ها حق زندگی بدون تبعیضات قومی، لسانی و مذهبی را دارند».

او افزوده‌است که طالبان با تمام کشورهای جهان به‌شمول امریکا خواهان روابط نیک هستند.

استانکزی از کشور تاجیکستان هم خواست تا روابط خود را با «امارت اسلامی» ایجاد کند و گفته که «ما با کشور تاجیکستان مشترکات بسیاری داریم».

معاون وزیر خارجه طالبان ترکمنستان را نیز دوست «امارت اسلامی» خطاب کرده و گفته‌است که «هیچ‌گاهی این کشور در امور داخلی ما مداخله نکرده‌است و ما هم مداخله نمی‌کنیم».

از میان کشورهای آسیای مرکزی، تاجیکستان تنها کشوری است که آشکار با سیاست طالبان مخالفت کرده و تاکنون با دولت فعلی کابل در ارتباط نیست.

امام‌علی رحمان؛ رییس جمهوری تاجیکستان بارها بر تشکیل دولت فراگیر با مشارکت اقوام افغانستان از جمله تاجیک‌ها تاکید کرده‌است. طالبان این اظهارات رحمان را مداخله در امور داخلی افغانستان خوانده و تهدید به پاسخ کرده‌بودند. اظهارات دوطرف منجر به تنش جدی شده تا جایی‌که گزارش شده‌بود که جوانب مقابل در مرزها مشترک، نیروی نظامی، مستقر کرده‌اند.

از سوی دیگر، تاجیکستان در حال حاضر میزبان مقام‌های «جبهه مقاومت» ضد طالبان به رهبری احمد مسعود است.